Accueil > Contributions > S tchawith > Aṣbeṛbeṛ acawi, mani ay yeṣṣawwaḍ ?
tikli n batent di 2017

Aṣbeṛbeṛ acawi, mani ay yeṣṣawwaḍ ?

S isenjaqen niɣ s izamulen n weẓṛef yetɣima umenɣas acawi ajemmaḍ n umennuɣ beṛṛa n umezru u deg leɛṛadt n tikli .

Assa wern n isuggasen d isuggasen n tɣeṛṣa s yimer ,tidi d idammen n tsednan d yirgazen a ucin i tmagit d wahil n tmetti a ɣef ad uzlen tizla n iɣeẓṛan ,werɛad cawi meskin jar n lbenj n wenber d umennuɣ aǧǧer n iceɛbab d wezgen-idin n uqeccabi d isefra n ugestur d usettur d tikli n tnafa ad d-yeṛẓin tgeǧet i tmaggiyin, ma ur ṣṣiɣṛent-id ca seg jemmaḍen ,lulent-id seg teɛzayem n imderwcen niɣ seg alliwen meslen s teskin n tfunasin .

U lḥirt tameqṛant ald ad sersen imenɣasen neɣ tasertit deg qedduḥ i yeɣrimen ,ya ad tsurfen ya ad ten-tsuref ,ya ad rewlen seg-s ya ad serwlen seg-s, da u d way yeǧǧin tmasext tceṛeɛ i way yennumen d ṭṭiqan .

Am-in seg-a sliɣ s teqṣidt n lmudir n Tkukt d ccix n Nqawes ren-as qafilet elkitab d Zeɣlul n l’izɛaj lɛilmi ur uggideɣ ca mammek ay yugdeɣ si lmuselsalat n Ṭṭuṛk d wahilen n isekkiwen n isɛudiyyen niɣ leflam n Lmarikan d imseẓṛiyyen n isallen neɣ d ya n lejnas xaṭeṛ d netni ay yelɣen tiṭṭawin u slilen alli u kerzen annar i yigurslen n yiḍan, ikeblan n laliju d tarwa n lkaẓmat .

Ma yibriden ay inejṛen zdat n ucawi meskin d sen n yibriden, atxenwej wa muctaqqatu-hu niɣ d aṣbeṛbeṛ bi anwaɛi-hi ad yeqqim ucawi deg twenbriyyin d uxenfuf ay yessadafen ɣer lɛafift  if aremmeɣ d utfenyeq u l ḥaṣul if “Cawi beṣṣeḥ idin” (xaṭeṛ beṣḥat tufeṛṛaqen) ma-dam amennuɣ yecreq s tikli n tarwa-nes ay yeččin alli n yifis imeṛqen s ugingiḍ u ma dam werɛad ur nzemmer ca ad nbed deg udem n iremmaɣen s ifeǧǧajen d imessenda eǧ imujahden d iweṛṛaten- nsen ad bedden deg udem-nsen u ǧǧet tamurt n icawiyyen ad teqqim deg awwel ṛaṣaṣatun u ad neqqim nečni deg senjaqen d izamulen n weẓṛef .

Ɣef tgara xseɣ ad iniɣ twalem saɛat netḥar way yifen ? cawi aberbuci niɣ cawi acexcuxi beṣṣeḥ neẓṛa belli ɣef uneggaru isnin ifen “cawi beṣṣeḥ…..” aged ma imezwura d imbeṣḥiyyen tambeṣḥit-nsen nennum-it u aḍan a nessen yif aḍan atrar u ad neqqim nessaram niɣ nettarjay s ucawi d cawi n tmurt d yimer yessen amezru yedder assa u yeẓṛa imal ay yexs mammek ad yili u smayes ad t-yawweḍ, beṣṣeḥ seg-a d aṣbeṛbeṛ ay yeqnen tizi ad n-tafed netxeyyaṛ jar n wenber d yibrir baca ur nettaf ca iman-neɣ deg muḥaṛṛem aged ma ulac lmuckil deg igarren mammek ay yella deg ixfawen .

Muḥ-terri

*tutlayt ɣef twenbrit deg-s ṣṣeḥ deg-s aqeǧǧem xaṭeṛ ɣer-i la twenbrit la yaṣbeṛbeṛ d dwa i tmurt .

Partages

Nous vous recommandons

Tilelli niɣ tawuri ? Mayen yexs Umeɣrabi?

Mayen umi qqaṛen “tilelli”? Tilelli tella xminni (asmi) afgan yettegg mayenma yexs maca asel ma …

Partages