Littérature&PoésieS tchawith

AMEƔBUN [ Asefru]

Nniɣ …

Matta ur rfiden zmamat

D tasuqilt …

D awalen ifen ljalat

D taẓuri d taḥerfant

N yiman n umeɣbun

Yeqnen isergal d amɣid

Aɛessas fell-as d aẓawan

Ad ḥerzen timasxiwin n ucewwiq

D timsideft ɣer lexyalat

Yeṭṭenḍen s wul

Jar n yefṣilen n temsunin

Aɛessas fell-asen d alli

Gara n tiẓeg d leɣmamat

Nniɣ …

Nniɣ anamek seddu n tifyar

Amek yeṭṭuṣeggem wawal

Ad bedden tabeddit n idurar

Ad ɛalan s-neg n ijenwan

Ad rzun ɣef uxellaṣ n umeɣbun

Yerruksin ɣef lqern d abejjar

Tcin-t, swin-t ṣrawat

N tinnuzɣa bla yabrid

Surint-as tiksarin d isuwwan

Yendac gara n ineglas n usgan

Ad yezzenz iman ad yesɣ talwit

Fell-as yedderwec yetna d asekran

Uzi n wawalen yeswi-t

Nniɣ …

Tarwiḥt n umeslay …

Gara n waḍu teṣṣuḍay …

Isura n wayen iɛeddan

Kerfen, qnen di tɣuct n temẓi

D agel n umsebrid

I lemmten leɛwin ɣer dat

Ass yesselmed-it

Ɣef leɛqab, yiḍ yessernunnes-it

Amekti d ugemmen ihred-it

Netta meskin yuli, yehwa

Ur yuc netta, d netta … d ameɣbun

D ameɣnas yetezzi bla ccan

Yedrus wazal n tusna n tmeɣṛutin

Ma tanya, reqmin-as tanza

S tedwayt n tḥessifin

Nniɣ …

U ad d-iniɣ …

S stillo ad arjiɣ

Si tmudri ad d-ffiɣ

Tugniwin a dreɣ ad d-ssiliɣ

D tmarjit di tilawt ahen-uɛiɣ

ɛla xir, a yinumak

ɛla xir, a yisekkilen

ɛla xir, a tmedyezt, a yungal

ɛla xir, ay ameɣbun n wawal.

 Yunes Aɣuggali

Articles similaires

Bouton retour en haut de la page