Art&CultureS tchawith

Ccerfa n Wadda, d ddeɛwessu n waman

Aḍris aya s-taqbaylit
Cet article est en Kabyle

Seg wass mi d-cfiɣ, Ccerfa n Wadda xussen-t waman. Ma gulleɣ ur ḥnitteɣ, ar g leɛmer ma ufan aseggas yelhan. Wissen ma d Jeddi Σmer Crif i hen-yedɛan, niɣ d ddeɛxessu n Iɛessasen i d-yersan fell-asen!

Da cu ar ad d-iniɣ, da cu ar ad ffreɣ. Tawaɣit tameqrant, g unebdu i d-tettrus. Uttali g ssmayem, susem kan ! Teqqelṭya ma tcuḥḥ tegnewt n Rebbi g ccetwa. Akka am useggas-nni n lbaykuṭ (1994-1995). Ccɣel ur yelli. Dayen i iceɣben medden. Wa ittɛasa wa. Iffeɣ-ihen leɛqel. Anda ma tella tala g taddart niɣ lɛinser g imudaɣ, ad tafeṭ lɛasker n tbidunin xedment laccan sdat-s. Am asseɛd ixxamen yesɛan xilla n twacult. Anda truḥeṭ ad tagemṭ tabidunt-ik, ahen-d tafeṭ zwaren-ak, kubrin, ttrajun ad teqqaṭ ṭertiqq-it waman ɣef lḥilat-nsen. Tiwraɣin, tizegzawin, tizeggaɣin, timellalin… Mkul lalwan. Ta teqqar-as I wlettma-s ṭɣurakin. Yerna lxetyar ur yelli; d tazeddgant, tezzunǧer, tseḥḥa, teqqars, tefla, tesɛa tadimt niɣ awer tesɛu, yella ufus niɣ awer t-iǧǧ Rebbi amek ad yili. Lḥasun kan, lḥila yellan g uxxam ad t-afeṭṭ g ḥedd n tliwa tɛellssef. Awid kan ad tili tettɛemmir, tetteffi-d. Γas Ncalleh d taṭawatt, d talilyant, d tabasalt, d taccuyt… Kulleci ǧuz.

Imezwura ǧǧan-t-id d awal: “Am uɣyul, am ṭṭfer-is, am bab-is !”. Akken ged gedi yemmug lḥal n imawlan n tbidunin-ayyi. Ad tafeṭ kra yixxamen, tibidunin-nsen, ad ibarek Rebbi, amzun d tiqellalin n zzit; d tizeddganin, d timeɛnanin, sɛant lmarka niɣ lbantura ɣef ufus-nsent akken ur tteɛraqent ara gar n lǧic-nni akelli. Yerna, yalyiwet tadimt-is tcudd s lxiṭ ɣur ufus-is. Ackit ad tessarameṭ ahent-ksebṭ. Ula d rriḥa-nsent tettfuḥu g ugemma ṭarwayeṭ. Bab-itsent niɣ lal-itsen ad t-afeṭ iḥbek-ihent s ifriwen n lɛunǧeǧ d ufuzzel. Ma ad tsuṭdeg-sent aman, ak-id yuɣal rruḥ. D ttibuqalin n tammemt. Tidak-ayyi, imawlan-nsent d leɛbad ɛali, d izeddganen, sɛanRreḥma Rebbi deg wulawen-nsen.

Meɛna, llant tbidunin n niṭen sdat-sent, aɣ-yester Rebbi kan ! As-t-iniṭ d aɣyul, ḥaca-k, itessendeg-sent .Inǧan, lqella n tdima, tifli g rrif, aqemmuc yef si s usafu, ahent-ɛuffeṭ mmaṭi ! Amzun d lḥila s wacu i ssenǧayen, niɣ tin s wacu i ssiriden lmeyyet. Tibidunin-ayyi, imawlan-nsent ya Laṭif telṭefṭ! D widak yettaɣen s tiṭṭ, ur k-ɛniɣ ! Tisseqlelt, cceḥḥa, lqella n tuccfa, lqella n lmeɛna, ulawen d lbaruḍ, aɛebb ur ṭisseblaɛ, ssifa tessexlaɛ !

Muḥend Ameqran Mahdi

Articles similaires

Bouton retour en haut de la page