Accueil > Contributions > Tidet Ur T-yetṛukk Wesgan
yunes Aɣuggali

Tidet Ur T-yetṛukk Wesgan

Nnan-d ayet uzik: “yeɣẓer ur yettaɣ abrid-nnes sent n lxeṭṛat” d ttay tɣawsa yellan bab n sen n tiṭṭawin yettaqqalen ɣer ɛecrin n iseggasen-aya ineggura deg ubrid n umennuɣ ɣef yedles d yiles amziɣ deg tmurt-nneɣ, u ma nuɛa-d isebtar n umezruy qli ɣer werni, ad d-naf tnukri n yergazen d lxalat teṛcem s isekkilen n yidem day mani “tafsut taberkant” tella u teqqim nettat d azwel ameqṛan s mayes ṛezmen timasxiwin n tikli ɣer dat bla werdaf ɣer deffer. Ma nwella ɣer wawal “amennuɣ” yerfed amek iqada inumak n isurifen a nedder tict wern n tict s tedqiqin d tsuwwaɛ; d abhaz ɣer wagel n imezwura s susegru d wefṣil, d trebzi ɣef ljal n wawal imeslen deg iẓeṛwan, d asuref n yimer d wemkan ɣer yegli mani taɣeṛma tartar n wemdan teẓda tajḍaṭṭ n imal d iwal.

Yal dderz ilaq-as azal, iswi ayef mmuten u twaḥbsen yergazen yilal-d itgara n ufaw n lefjer ma hennid d tmarjit, wa a yellan ur yumin-ca neɣ yeṣṣemẓi seg tɣawsa-aya ha-t d “Buxuṣ” n yimer-nnes, ad yeẓwa ad yesseqsa yefṣilen n lḥebs n “Lberwagiyya” d “Lumbaz”. Yal taneḍruyt deg umezruy d tteḥjimt s weslu aberkan yetterqiqqiɛen deg udmawen n iḍerɣalen d yya a yesderɣalen imdanen ɣef tidet, yecfa wa d-yennan: “ixellaṣen n wussan d uṛeɣ”. Aserkis yezmer ad yenneḍ amaḍal jemla kemla, u din s-tma-nnes tidet la tetteqqen tirkasin-nnes, d way matta netedder ass-a sugga neṣṣiwwed u nesla u neẓra s wablien, allen, d wulawen “Tamaziɣt” d tunṣibt, u ikemmel fell-as uterras s wudem n lbaṛud u yerna-s aked “Yennar”. Ina-s i yeɣrimen ad amnen neɣ ad felqen seg leḥmeẓ!

Deg tsirt n umedwal la yeẓẓaḍ uherrar ussan-aya ɣef tmaziɣt deg yal tama, seg tiliẓṛi, ṛṛadyuwwat ald yexxamen d leqhawi ma hennid d ttajnu tehwa-d ɣef yexfawen, deg unebdu. A yesḥarayen yesbeḥarayen netta d yudan a tewwi ljalt n “taɛṛubit tineslemt” yellan iṛḍen yeɛlawen aked nehni u wellan “sbuṛbiṛen” ttun belli jaref a yesseɛrqen tikli ur yezmir ad iwella ɣer tmilli u ad as-tesselmed ad yegr asurif! Maɛlic, Dzayer tistaɛ u tɛerrem, aɣen-terfed yejmel aked ma nella!

Neqqim netraja, nerẓem imawen am yefṛax yetjajan ɣef leɛwin n yemma-tsen, seg “Usqamu” wissen ma ad tili “takadimit” n timmuzɣa ad yeslalen awmaten (yeɣrimen) a yellan ur sawwiden-ca ma d yict n yiles ahen iferqen neɣ d ɛecra. Imir-a ulac matta ad neffer s-ddu n tfukt, u ma yeffer ha-t s ufus n ca a yetwaffer mamek a nennum. Bab n wexxam ur yetṛaja abeṛṛani ad as-yessili axxam ma netta d bu-fadden d ameṛẓu, u bac ur nettenneḍ-ca ɣef uzarzu ad d-nini: tlul-d “Takadimit” n usegmi n yiles d yedles amaziɣ u ṣṣiwden sergen-d amawal unṣib n umaziɣ adzayri; kkes ma tuɛer mliḥ i uṣiwweḍ, matta n wamken ad yeṭṭef ucawi s tcawit-nnes deg-s? Tay ma neẓṛa belli ageṛṛuj a yegzin seg “Usqamu Unnig n Timmuzɣa” deg ayen yeɛnan Tacawit ad nenneḥcem aked ad t-nekta. U bla ma ad nessers tiẓeg ukk ɣef ṭṭabeq n yudan; matta yezmer i nečni icawiyyen ad t-nsawa bac ad nessili yefṣilen u ad nṣeqqef axxam-nneɣ s ifassen d tidi-nneɣ? Akkes ma njebed-d awal ɣef ttawilat d leqdic n imusnawen icawiyyen deg uḥric-aya n tgemmayt n yiles seg adlisen ald werzaw unnig deg tseddawit, day yezmer ad nessusem u nniig xemsa ɣef imawen-nneɣ! Deg temsal-aya, nessaram kan ur aɣen-tḍeṛra-ca am imezdaɣ n taɣṛemt n “Océania” a yekta umyaru ameqṛan “George Orwel” deg ungal-nnes “1984” a yergen deg useggas n 1949.

Tamaziɣt aksum-nnes d asemmam, mamek a yeqqar umeɣnas “Smaɛil Ɛeggun”, ur tetrag ɣef ilebbaẓen d icekkamen a yirexxan i tiwa-nsen s-dat ubeṛrani, amma aɣen selmden wussan, u ma nella d imaziɣen yexḍa d zkart deg udan neɣ d asɛeddi n yimer s ccihat uberk, tinettit n umaziɣ axaṭṭer d amaziɣ a lliɣ; mamek a yenna “Kateb Yacine”. Neč ad iniɣ: mamek ad nili d imaziɣen ma nesseɛreq Tacawit-nneɣ a yifessin am teftilt ass wern n wass? Neɣ ad d-neǧ tayemmat-nneɣ a tenkeɛ “Numidya” seg tallit n zizi d zizi-s u ad neṛẓem imawen am yefṛax?!

Imeɣnasen ukk ẓṛin belli amennuɣ ɣef Tmaziɣt akkas yeqqen ɣer tsertit, u yal ddurt llant tiɣawsiwin yessugurayen neɣ qnent ɣer usezreg n temsal; Imir-a yemmir yirar u yekfa wawal, annar flalen-d ayet bab-nnes, u amennuɣ yiṛeḍ aṛuḍ unṣib yerni s yisem unnig n imdebṛen yellan iḍelli utin fell-as nneḥ. Ass-a ljamat ṭfenhen imusnawen d ayet bab n usezreg d umenyef deg yal aḥric n unadi d leqdic: bda-t seg tesnilest truḥed gara-nnes ald tgara.

Nečni deg Awras ur ɣer-neɣ-ca n tenwal tict mani ad d-neffer yexfawen-nneɣ bla tamusni d werzaw d leqdic “Akadimi” unnig s mayes a nqum, yerni s wudem atrar n wass-a mani taselkimt d tmacint twella tuker amkan n wemdan. Luqq-a ma nexs ad d-neɣmi u ad d-nali am timettiyin lkul, acawi yezmer-as ad iɛaned u ad yesmenyef ɣef agel-nnes am netta am yudan. A nexs yella ur neɛqil ma ɣer-s azal! Timesmunin llant am ubelluḍ! Beṣṣeḥ lxedmet txuṣ asegder d umares s tɣessa tatrart ta ad yucen yiman d atrar i yedles-nnes yeqqimen yekmes deg teqbuṛin d tineffusin. Nanna –Rebba ad t-yerḥem- teqqar: “Wa ur as-tesaqqi-ca yemma-s ad yens sinn”.

Yunes Aɣuggali

Partages

Nous vous recommandons

Ɣef Murakuc ad yenḍar Tafṛansist ad yesselmed Tinglizt

Aṭṭas iseggusa zeggʷami ssentan Yimurakuciyen ssawalen ɣef tɣawsa en tutlayt Tafṛansist di Murakuc. Mayemmi (max?) …

Partages