Littérature&PoésieS tchawith

Taɛrict s iẓuṛan deg ujenna

Jar n tejdaḍin n tmurt d ujenna tuli mebla yafriwen teεrict, d taεrict ay yessiγen iẓuṛan deg tiγḍayet d tirrawt n ujenna n tsekla n tefrikt n ugaffa . D tajmilt i Kateb Yasin, tuta taεrict n mas Aγuggali Yunes s tili-nes γef tmedyezt s tcawit tγum imuda ay nessen tessettu-aneγ deg isefra ay nelmed . mas Aγuggali Yunes ay yebdan tikli nes tamezwarut deg annar n utmedyez d tsekla s tutlayet taneglizit, mani yugir deg-s s isurifen n umusnaw u deg 2006, deg iγẓeṛ ameqṛan ay yeṛẓa tgaǧet i tmusni-nes tamaḍlant γer tsekla tacawit mani ay yufrar s tmedyezt timserrḥt niγ tilellit u yenna s teɛrict ass-a tlalit n tmedyezt tatrart s tcawit s ilugan d tugniwin ay inejṛen s tmusni d tẓuṛi werɛad ur t-nufi ca ɣer imedyazen icawiyyen ya ad t-yezwaren .

Taεrict ay ibedden γef 40 n isefra, yal asefru deg-sen d lefnaṛ ɣef yixef n webrid i way yexsen ad yeẓṛ s tfawet u ad yeẓṛ tfawet n walli d wul, s isekkilen ẓeṛtṭen d iḥeckulen, d teɛzayem n tiktiwin d iḥulfan d tmuɣli d tuɣṛiṣt deg iman d d tmetti, yeɛni igmiren d cḥud n tmudri d tmeddurt .

Isefra n mas Aɣuggali Yunes imuṛkantiyyen s wawalen, tiktayin d tugniwin zwaren isefra s tcawit ay nessen, u way ad sen-yernin deg azal d taγessa tatrart a ur nufi ca way ixedmen i-s zdat-s .

Tajmilt i Kateb Yasin durt-aya tella d tameqṛant s wazal n umeqṛan am Kateb Yasin, u tazwart n mas Ḥasan Meḥṛuc tella d tiran umusnaw-idin ay nessen, ay yennan tidet, aṛeb tidet, wellica mebla tidet . U s lexṣuṣ n tnemmirt, s yisem inu neč d yisem n mas Ḥamid Ibriad k-d-iniɣ tanemmirt seg ul n wul, tanemmirt i cek mas Aɣuggali ad ɣen-yucin iḍṛiṣen s tcawit ay iɛzizen fella-neɣ stahlen ad twaqṛan . Tanemmirt i cek ay yeǧin i tarjit-neɣ luheṛ deg tilawt .

 Ɣef uneggaru xseɣ ad wen-diniɣ, ma teẓṛim ɣer-i azal n setta n igarren ur ktibeɣ ca s sebbet n tɣawsiwin ur tuc lweqqet ad nutlay fella-sen mbeṣṣeḥ tazmamt am teɛrict ad senṭeq aged aḥdir xaṭer amud n mas Aɣuggali Yunes d Tadyant ay yestahlen tizmamin ad utlayent fella-s . U zeng n wazal-nes amseklan ɣer-s azal yect, d azal d aḥḥellaq deg ubrid n umennuɣ d azal n way yucin maci s ufelgem d azal n way iteɛben maci way nezmer ad nini fella-s si lqellet n tɣallin ay yettuqeṛbeṣ uɣeṛẓul . s teɛrict yenna mas Aɣuggali belli imnayen inumiden werɛad ur ngiren ca, s wemraw maci s ugestur , s wul d walli maci s uɣil d tikli n ihuligen deg ubrid n ixeǧifen n lɣiḍ n yiḍeṣ .

Kamel Tiḥmamin

Articles similaires

Bouton retour en haut de la page