Amezgun d tmagit Ald ad temlil tmusni d tẓuṛi
Deg tezrigt tis-ṭam n tfaṣka , temlil tmusni d tẓuṛi deg tẓeqqa n isaragen deg ugezdu n tutlayet d yedles amaziɣ deg tseddawit n Tbatent deg wass wis-kuz seg tedyanin n wahil .
Mlilen deg tzeqqa n isaragen inelmaden n ugezdu n tutlayet d yedles amaziɣ n Tbatent s wudmawen d imuqṛanen n tmusni d yedles , mani ay yriɛ uherrar deg umezruy d sbayer ay ɣef yiɣayel umezgun ɣer yimaziɣen , u ɣef way ay yutlay mass Sasi Ɛabdi s temsideft ɣef umezruy n yudan seg umezwaru amezwaru ɣer sbayer n ledyan ay iɛeddan ɣef ugdud amaziɣ , u deg unnar-aya ay yella usarag n mass Ɛeddun Ɛli aged ma yerni tikti deg ul n wezwel n temlilit , mani ay itebbet mliḥ ɣef ljeṛṛet n tmagit deg umezgun s umedya n ayrad n yennaṛ ɣer Ayet Snus d ayrad deg iɣẓeṛ n Riɣ , ay yetteffin seg yect n uḥamu n ccayeb n ɛcuṛa di tmurt n yicawiyyen , u deg yect n webrid yugir mass Nabil Ḥwini seg tsedwit n Dzayer deg awal-nes mani yenna u itebbet ɣef lemlaḥim n umezgun di sber n tislit n wenẓaṛ d uɛaṛuṣ , ɣer leqbayel .isaragen n wass-a ur qqinen ca ɣer sbayer d umezruy aqbuṛ berk , wa seg-way yutlay Mass Sebti Mɛellem ɣef umeɣnas d wudem n umezgun amuqṛan , kamaṛad Cebbaḥ Lmekki .
Cebbaḥ Lmekki , ṣṛa ay yetwattun
Azduklan ay yetẓallan s yixeddamen deg luzin , naẓuṛ ay yemrun mṛaw d ṭam n tceqqufin , memmi-s n Ayet Ɛebd Ṛṛeḥman seg Temzireɛt , ay yutin s wawal , u isergel-it deg ibriden n ṣeḥṛa Ferɛun leɛṛeb .
Ilul-d umeɣnas n wawras deg “agim d ṭam n tmedyin d ṭm n mṛawt d kuz” 1884 ɣef ucal n Sidi Ɛuqba , deg “agim d ṭeẓẓa n tmedyin d kṛaḍ n mṛawat d kuz” 1934 , wern n temlilit n cṛa n imeɣnasen , ikeṛkeṛ-it lbac-aɣa Ben Gana yekref , wern n ujaduṛ seg Sidi Ɛuqba ɣer lḥebs n Ulad Jellal .
Farɛun Leɛṛeb ur yenjim ca ad yisergel alli n memmi-s n ukabar azduklan , ay yeqqaren ur ken-tḥettameɣ ca ad tugirem abrid-inu , mbeṣṣeḥ neč ur teǧiɣ ca amennuɣ d tbeddit deg udem n lḥeqret , niɣ mammek ay yenna Niṛuda , ur tṛajiɣ ca i yiman-inu tawellit , ɣef tfawet ur netwella deg quqqec n ddunit .
Kamaṛad lmumen , i mumi ad d-sergen izduklanen tamber ay yetwageḍlen , u tella fella-s lexṭeyyet d ugur n lḥebs , yemmut deg “agim d ṭezza n tmedyin d ṭeẓẓa n mṛawat d yect” 1991 , mebla imeṭṭi d unṣib , mebla isem deg zenqet niɣ d annar .
Kamel Tihmamin
