Maɛṭub Lwennas d isem yetwasnen ,d argaz yucin azal i wnammek n tirrugza , d amedyaz d bab n uɣerbaz nes n tmedyezt .d naẓuṛ ay imewṛen isem-nes deg mezru n uzawan ameḍlan .
Mbeṣṣeḥ Meɛṭub Lwennas a ɣef ad wen-d-ɛawdeɣ d Meɛṭub agrawli , yeqqar Či Gifara baca ad tilid d agrawli ilaq ya ad temted ,ya ad ternid iɣrimen u Meɛṭub yrna s tmettant-nes iɣrimen n tudert.
U ass-a ur tutlayeɣ-ca ɣef meɛṭub ɣer leqbayel ,xaṭeṛ ẓṛiɣ d izem aɣilas , mi-s n tsedda ! ad utlayeɣ ass-a ɣef Meɛṭub Lwennas di tmurt n icawiyyen , u ad ɛeṛḍeɣ ad mruɣ mebla ma ad d-yemrara fella wul-inu ,xaṭeṛ da di tmurt n icawiyyen Meɛṭub di triku u daɛec deg ixef ,Meɛṭub deg imi u yenɛel-bu lɛilmaniyya deg ul , u ad iniɣ u Ṛebbi d cahed , sneɣ yay yrezzen ixef s Meɛṭub u netni tamnen belli tamurt muṣaṭṭaḥa ,u lfahem yefhem .
Lwennas a ycawiyyen baca ad t-nessen d mumi d mattat ilaq ad nessen wa ad t-yenɣin ,ur neqqar-ca d lḥukm n webhim ur neqqar-ca ya ay yetadfen leḥkum ɣef tfednet ,ur neqqar-ca d cḥud ur neqqar-ca d iremmaɣen n idurar , Maɛṭub Lwennas nɣint iɛdawen n tfawet ɣef yixef n webrid ,iɛdawen n tlelli d tugdudt , iɛdawen n tɣeṛma ,iɛdawen n umezru d yimal . u da tban way yenɣin Meɛṭub .tenɣ-it tmetti lɣin-as tiṭṭawin s sbayr d lkif n usammer ,yenɣ-it wegdud yttamen s dult n l xilafa u yiḥeṛṛeq ɣer tmurt n lkufr nṣaṛa.
Meɛṭub seg udan yedrusen ur yugiren-ca abrid seg ibriden ay yufa zdat-s ,di lweqqet n ḥaḥ u lala ur yenni teḥya ur yeni ɛalayha namut , yegra ḍar deg ubrid ay yiga i yiman -nes u yesselmed-aneɣ tikli n timanit , timanit n walli ,timanit n ṛay u timanit n umennuɣ ,Meɛṭub yẓẓuɣeṛ iḍeṛɣalen s uzawan , yṣṣud igujilen s wawal ,yuca ilɛuyyab afriwen s tmettant-nes ,meeɛṭub d aɣemmay aḥṛuṛ n idurar d aneggaru n ṣullaḥ d lwali n tlelli d netta yucin leɛmeṛ-nes i tmurt d as d atrar .
Meɛṭub Lwennas qaren nɣin-t ,u mammek ay yena yessiwel wanza nes ass-a mammek ur tessiwil-ca snitra-nes zik .ydder ass-a mammek ur yeddir-ca di leɛmeṛ-nes . Meɛṭub ass-a d zamul n wazalen n tmudri , d ameɣṛaṣ yessedren asirem d tumla , d afsut akkas ɣef ṭul n usuggas maci d tazuggaɣt u maci d taberkant .Meɛṭub Lwennas ma terzud ɣef yisem-nes deg umawal ad d-tafed tilelli d tirrugza .
u ɣef uneggaru ad seqsiɣ icawiyyen .ma-ɣef di 25 jwan lḥukumt tettazzal ad tig tajmilt i meɛṭub di tmurt n leqbayel , u di tmurt n icawiyyen nenjem ad nig tajmilt i Maykel Jakṣun ur nezmir-ca ad t-nig i Meɛṭub .ad wen-d-iniɣ mah ? xaṭeṛ Lwennas d tafukt ur teggar-ca ɣef imezdaɣen n yifran , d faw ur t-ẓeṛṛen-ca iḍeṛɣalen n wul d walli .
Kamel Tiḥmamin
